Updating my 30 List

I have 4 months to accomplish everything! Goodluck sa akin.
So far, nasaan na ba ako? Mabalikan nga ang 30 list ko:

1. Shoot my own film - goodluck to me. a short will probably do. after my recovery. haha.
2. Win another Palanca - won for KBC: Samahan ng mga bitter!
3. Direct a Kultura play - i'm directing "Servant of Two Masters" for February
4. Finish a full length play - currently rewriting "zero" and "sais," also working on "eX: sampung kwento ng naunsyaming pag-ibig"
5. Finish a new musicale (Luna, prinsesa ng buwan) - this one i might do abroad.
6. Apply for any foreign grant to study abroad
7. Leave the country for a while - sana this christmas or before summer. singapore.
8. Fill up my sketch pad with drawings
9. Camp on a mountain - conquered Mt. Pulag last weekend! Sakit sa katawan!
10. Kiss someone I just met - not proud of this story but definitely one for the books. haha.
11. Kiss an old romantic flame - mas masarap pala pag bawal. haha.
12. Train in a martial art - i resolve to do boxing early next year
13. Work out / play basketball again
14. Write poetry again - trying but can't finish one.
15. Go hitchhiking / backpacking - JJ, help!
16. Raise ACASIA's first Million - malapit na.
17. Go on a vacation with my family - went to Macau last october.
18. Learn to paint - wiz already gave me my paint set, canvass and brush. now pick it up!
19. Relearn the violin
20. Learn a foreign language
21. Apply for my PhD
22. Stage a new original that I wrote - i hope to stage KBC this march.
23. Say "I love you" to people I couldn't say it to
24. Publish a book (of plays?) - tatlong utos quotable quotes???
25. Finish my thesis - working on it.
26. Finish a full-length screenplay - finished one for jourdan. an action comedy
27. Write a graphic novel
28. Write a new song
29. Enter cinemalaya
30. Fall in love

shet. 23 to go.

Artistang Artlets presents

Pagkatapos mong kiligin sa "Twenty Questions,"

tikman mo naman ang pait.

Panoorin ang kauna-unahang buong pagtatanghal ng Kapeng Barako Club.

(siyempre abangan nyo rin yung version ko sa February)

Kita-kits!

Unang Tula

(para kay alex)


binasag mo
ang pananahimik ng aking tula

upang hanapin ang pag-ibig sa pagitan ng mga berso
at salatin ang gaspang at kinis ng mga tanong ko

kung totoo

nga bang bilog ang mundo

sa loob ng naalimpungatan kong uniberso.

binasag mo.

pinulot ko
ang mga bubog ng aking talinghaga

at pinilit kong humubog ng tula
ngunit nabuo’y mga kristal na alaala

ng mga luma

kong tula ng pag-ibig

na inukit ko sa tubig

na binasag mo
upang manahimik ang aking tula.

Walang Meron (excerpt from KBC: Samahan ng mga Bitter)

ERIC. I can't be Ed's best man.

MARLOWE. Of course you can. You won the bride for him. (tatawa)

ERIC. Gago.

Tahimik.

ERIC. Walang nangyari sa’min.

MARLOWE. Wala?

ERIC. Wala.

MARLOWE. Wala.

Tahimik.

ERIC. Well muntik na.

MARLOWE. E di hindi wala ‘yon.

ERIC. Wala akong ginawa.

MARLOWE. Wala?

ERIC. Wala.

MARLOWE. Okay. Wala.

ERIC. Meron.

MARLOWE. Walang meron?

ERIC. Hindi ko magawa.

MARLOWE. O baka hindi niya magawa?

ERIC. Does it make a difference?

MARLOWE. Tingin mo, bakit sa lahat ng lalake sa buhay niya, sayo pa lang siya hindi nakikipagsex?

ERIC. You have slept with Masi?

MARLOWE. That’s not the point.

ERIC. Tangina Marlowe…si Masi?

MARLOWE. Focus! Pare, focus! May nangyari sa inyo the other night.

Tahimik.

ERIC. Pa'no mo nalaman?

MARLOWE. Trabaho kong manood ng tao, Eric.

ERIC. Walang nangyari sa amin.

MARLOWE. Alam ko. Wala. Pero meron.

ERIC. Hindi ko magagawa.

MARLOWE. Hindi rin niya magagawa.

ERIC. Dahil ayaw niya sa akin.

MARLOWE. Explain mo nga sa akin kung paano ka naging summa cum laude ng batch mo.

Ang Gabi ni Ebang Bakulaw

(Isang mahabang love poem sa ilalim ng balite)

i. prologo: pagbukas at pagbulwak

bumubukaka ang dilim

sa dilat kong mata

upang masuyo ng aking hininga

ang pahapyaw na liwanag

ng ngiti sa pagitan ng iyong mga hita’t binti.

Bumubuka ang dilim

Bumubukaka ang lilim

Lumiliwanag ang anino

Kumukulo ang orgasmo

Nanginginig ang pandinig

Ng musika ng pagniniig

At panginginig

Sa saliw ng pagyanig

Ng malamig kong titig.

Bumubukaka ang dilim

Bumubuka ang dilim

Bumubulwak ang dugo

Bumubukas ang sulo

Bumubukas, sumisindi, lumiliyab, lumalagablab

Sa alab ng alapaap

na itim

sa pagbukas ng dilim

Lumalamig ang lambing

Ng labi at lambi

Lumalandi ang labi

Ng yumaong lambing.

Lumalamig ang dilim

Ng bukakang itim

Sa lambing at lambi

Ng labi at labi.

Bumubukaka ang dilim

Bumubuka ang lihim

Lumalamig ang kimkim

Na lilim ng lihim.

Nililimot ng lihim mo

ang pahapyaw na liwanag

ng ngiti sa pagitan ng iyong mga hita’t binti.

ii. bilog ang buwan sa ilalim ng balite

bilog ang buwan sa ilalim ng balite

busog ang dilim sa mga kuwentong maitim

dilat ang mata ko sa katititig sa iyo

o buwang madilim

o buwang malihim.

Bilog ang buwan sa ilalim ng balite

Pinupuno ng lunggati ang sabik kong ngiti

Binubusog sa orgasmo ang panaginip kong itim

Na bumuka sa mata ng dilim ng lihim.

Bilog ang buwan sa ilalim ng balite

Pinalalamig ng lilim ang yakap ng hangin

Hinihintay ko ang pagbaba ng paraluman

Hinihintay ko ang pag-awit ng buwan.

Dilat ang mata sa katititig sa iyo

O buwang madilim umawit ka ng mito :

Upang bumaba ang aking paraluman

At mamalas ang lihim ng mukha niyang bathaluman.

Dilat ang mata sa katititig sa iyo

O buwang malihim ibulong ang gusto

Ang langit, ang langit, sumisilay sa’yong singit

O paralumang diwata na ang mata ay singkit.

Bilog ang buwan sa ilalim ng balite

Hinihintay kong lumantad ang kanyang ngiti

Upang bumulwak ang pahapyaw na liwanag

ng ngiti sa pagitan ng iyong mga hita’t binti.

iii. Ebang bakulaw

Sasara ang bulaklak

Bubuka ang bulaklak

Lalabas ang reyna

Sasayaw ng cha-cha

Bum-ti-yaya ! Bum-ti-yaya! Bum-yeye!

Ang lahat ng pangit

Ay nagtatago sa dilim

Ang lahat ng lagim

Ay nagtatago sa itim

Ang lahat ng lihim

Ay nanlalamig sa lilim

Ang lahat ng lilim

Bumubulwak sa dilim

Ang buhok niya’y dumadaloy na araw,

Bawat hibla’y gabing pumapanaw.

Mga mata niya’y kristal na uniberso,

Ang kanyang hininga’y hinabing mga berso.

Ang kanyang labi’t ngiti’y eternal na dalumat,

Ang kanyang tinig at titig ay gintong alamat.

Ang kanyang mga pisngi’y dambana ng mga halik

Ang kanyang mga halik ay daungan ng pintig.

Ang mga mata ko’y kanyang inalipin

Nang siya’y bumaba sa punong madilim

Ang aking haraya’y kanyang kinakain

Nang siya’y pumanaog sa halamang malihim.

Bum-ti-yaya ! Bum-ti-yaya! Bum-yeye!

Bum-ti-yaya ! Bum-ti-yaya! Bum-yeye!

iv. sayaw ng alipin at bakulaw

walang kasing liwanag ang kanyang mga kamay

na aking hinawakan, hinagka’t, ikinampay

saka kami’y magkayakap at paikot na sumayaw

sa saliw ng awit ng hanging maginaw.

Walang kasing liwanag ang kanyang mga kamay

Idinampi niya ito sa pisngi kong walang kulay.

Pinahid niya ang luha ng paghihintay

At nangakong makikipagsayaw habangbuhay.

a.

idinampi niya sa pisngi kong walang kulay,

rikit at hiwaga ng kanyang mga kamay.

indak sa musika’y tulang dakila

sayaw sa dilim ay eternal na talinghaga

dahil lilim ng lihim ay maliwanag

epidemyang laganap ang ngiting binubunyag.

lason na ngiti’y dilim na kumakagat

ay ! ang kanyang tinig ay gintong alamat.

tulog pa ang umaga sa pagsayaw ng bakulaw

oras ma’y tumitigil sa kanyang pagpalahaw.

retasong tagpi-tagpi ang alaala ng gabi

relasyong kailan ma’y di malilimot sa ngiti.

ewan ko kung kailan ako dadalawin ng araw.

b.

ang alindog ng halimaw na bathaluman ang mukha

na tanging bumibihag sa puyat kong mga mata

ay di na magpapapatak ng kahit isang luha

at di na hahayaang ang mata ay magmuta.

nang siya’y pumanaog at kami’y magsayaw

sa saliw ng awit ng hanging maginaw,

ang kanyang mga pisngi’y naging daungan ng halik

oras ay tumigil sa bawat pintig ng dibdib.

c.

musikang eternal ang maayang nang-aakit,

alisan ng pangamba ang takot kong pumikit.

retasong tagpi-tagpi ang alaala ng gabi

ilaw sa pagsayaw ang namamanghang guni-guni

ewan ko kung kailan ako dadalawin ng araw

pag tuluyan na sigurong ang haraya ay pumanaw.

ulilain man ako ng talinghaga ng isip

yayakapin ko pa rin ang misteryo ng bakulaw

alilain man ako ng kanyang malihim na ngiti

tunawin man ako ng liwanag ng araw.

v. epilogo : isang love poem sa ilalim ng balite

Bubuka ang bulaklak

Lalabas ang reyna

Ang pag-ibig ko sa iyo

O Ebang bakulaw

Ay higit pa sa sangsang

Ng katas ng kakwate

Sa dibdib ng lungayngay

Na kalaliman ng gabi

Ngunit mas masarap pang

Ihambing sa tsokolateng

Tinunaw sa sarap

Ng kapusukan ng gabi.

Bilog ang buwan sa ilalim ng balite

Pinupuno ng lunggati ang sabik kong ngiti

Pumapanik na ang diyosang paraluman

Ngunit sabi niya sa aki’y di niya ako iiwan.

Bumubuka ang dilim

Bumubukaka ang lilim

Lumiliwanag ang anino

Kumukulo ang orgasmo

Nanginginig ang pandinig

Ng musika ng pagniniig

At panginginig

Sa saliw ng pagyanig

Ng malamig kong titig.

Hindi raw niya ako iiwan

Iyan ang pangako niya

Sa ilalim ng balite

Saksi ang itim na buwan.

Kaya’t ako ay nag-iwan

Ako ay nagpunla

Ng tatlong patak ng luha

Na inialay ko sa lupa

At sa aking pagtalikod

May umusbong na makahiya

At sa maputlang pisngi ko’y

May nagmarkang alaala.